Decolonial Travel Guide Tanzania

Lakini uhusiano kati ya Tanzania na Ujerumani hauishii tu kwa utalii wala ushirikiano wa maendeleo. Mataifa haya mawili pia yanashirikiana historia. Ukoloni wa Kijerumani katika Afrika ya Mashariki ulileta mabadiliko makubwa ya kijamii, kitamaduni, kiuchumi na kisiasa. Athari za enzi hiyo ya ukatili bado zinaonekana wazi—kwenye majengo, vituo vya reli, makaburi, majina ya barabara, sanamu za wapigania uhuru, makumbusho na simulizi za mdomo zinazorithishwa kizazi hadi kizazi.

Tovuti na kitabu hiki (chenye taarifa lukuki na mazoezi) kinatoa dira ya mwongozo kwa wasafiri wenye mtazamo tofauti.

Ni safari ya kurudi nyuma—kwenye enzi ya ukoloni wa Kijerumani kati ya 1884 hadi 1918. Lakini historia hiyo bado hai; inaathiri maisha ya sasa na ya baadaye. Ndiyo maana kitabu hiki pia ni safari ya sasa kupitia Tanzania. Wasanii, waongoza watalii, wanaharakati na watafiti wanahifadhi historia ya ukoloni kwa njia za ubunifu na za haki. Ni safari ya kusikiliza, kujifunza, kuelewa upya. Mwongozo huu wa kusafiri ni mwaliko: kwa utalii unaojali, unaoshirikiana, unaojumuisha na unaopinga ukoloni. Utalii unaodumu, wa haki kijamii na wa kirafiki kwa mazingira. Utalii unaoangazia historia badala ya kuificha. Utalii usiorudia dhuluma za zamani bali unaotafuta namna ya kuwajibika—hata kama mgeni.

Katika makala za kitabu hiki tunakutana na maeneo, watu, na mitazamo. Waandishi kutoka Tanzania na Ujerumani wameshiriki. Wanazungumzia uendelezaji wa ukoloni, mapendeleo ya watalii Wazungu, wanashirikisha maarifa ya kihistoria na kutoa mwongozo wa kusafiri kwa haki zaidi.

Ni muhimu kubainisha: Mtazamo unaozingatia kipindi cha ukoloni pekee unaweza kupunguza upeo na kuendeleza dhana ya “Afrika isiyo na historia kabla ya ujio wa Wazungu” – kwa hivyo, kwa ajili ya safari za kidekolonia, ni muhimu vilevile kushughulika na historia ya kabla ya ukoloni! Pia: Katika baadhi ya maeneo bado kuna mabaki ya urithi wa kikoloni ambayo hayajachambuliwa kwa kina, hayana mtazamo wa pande nyingi au hayajawekwa katika muktadha – tunabainisha mapengo haya ya uchambuzi wa kina na kuwalika wasomaji kuyafahamu zaidi kupitia mapendekezo ya vyombo vya habari vilivyotolewa.

Mwongozo wa Safari wa Tanzania wenye mtazamo wa kujikwamua na ukoloni (The Decolonial Travel Guide to Tanzania) hautangazi kuwa na taarifa zote (sio kama kitabu hiki kina taarifa zote). Lakini ni mwanzo. Ni mkusanyiko wa maarifa. Ni mwaliko wa pamoja wa kukumbuka, kujifunza na kutafakari.